2011 war dat 32. Ellénger Quetschefest  

Freides 9. September

19:00 Auer       Verkaf vum „Ellenger Quetschekraut“ & „Ellénger Quetschentaart“

21:00 Auer       “Queesch duerch den Déiregaard“

                            featuring:   The Savages & The Traders

DJ Dizko Inferno

                                   Org.: Jugend Amicale Elleng

Samschdes 10. September

11:00 Auer        Wëllkomm um Ellenger Quetschefest

Alles dréit sech ronderëm d’Quetschen, Quetschekraut, Quetschentaart, Quetschendrëpp …. Berliner, Waafelen, Paangescher ...

·              Knackeges vum Grill an Erfrëschendes vum Faas

·              Verkaf vum „Ellenger Quetschekraut“ & „Ellenger Quetschentaart“

17:00 Auer        Ellenger Kascht

·        Ellenger Ierbessebulli

·        Geschnetzeltes mat Räis

·        Pouletsflilleken op portugiesesch Art a Weis

19:30 Auer        ROCK am Déiregaard 7

Elefant Ghost        Traffic Jam        Vintage Gigolos             Pol Said        Anthem of the Sun

                            Org.: Jugend Amicale Elleng

Sonndes 11. September

11:00 Auer        Suite vum Quetschefest     -      Kiirmes-Apéro

Alles dréit sech ronderëm d’Quetschen, Quetschekraut, Quetschentaart, Quetschendrëpp …. Berliner, Waafelen, Paangescher ...

12:00 Auer        Ellenger Kascht (am Centre)

·              Ellenger Choucroute

·              Geschnetzeltes mat Räis

·              Pouletsflilleken op portugiesesch Art a Weis

16:00 Auer        Kiirmes-Concert >> Harmonie Municipale Mondorf-les-Bains

17:00 Auer        Uucht a Bal mam Orchester « Happy Sound »

Schaff-Historik vum “Ellénger Quetschefest”

(Quelle: Privatarchiv RG & Archiv „Amicale Elléng”)

Am Laf vun der 25-jähreger Geschicht vun der Amicale Elléng huet d’Quetschefest nach ëmmer eng grouss Roll gespillt. D’Fest huet ganz kleng ugefaang an huet sech am Laf vun der Zäit zu deem entwéckelt, wat ët haut as.

All Joer Mëtt September widderhëllt sech eist regional bekannte Quetschefest. Dëst as fir Elléng déi “kleng Kiirmes”, d’Fest vum hellege Bëschof a Märtyrer Lambertus, den éischten Schutzpatroun vun Elléng. Déi reliéis Feierlechkeeten fannen meeschtens Sonndes virum Quetschefest statt. Op dësem Dag gët eng Mass zu Eieren vum hl. Lambertus gefeiert an duerch d’Duerf geet uschléissend d’Lambertus-Prëzessioun. An dëser Prëzessioun geet och d’Statue vum hellege Lambertus mat, däer hire Sockel mat Quetschen an Quetschenäscht geröscht as. Sou as de Lien gemaach zum Quetschefest, mat deem d’Amicale Elléng déi „kleng Kiirmes – Lambertus-kiirmes“ erëm méi bekannt wollt maachen. Et sollt erëm en Dag vu Begéignong sin, wéi an alen Zäiten.

„Quetschen, Quetschen, Quetschen“ heescht de Motto vum Quetschefest: vun der Quetscheschmier an der Quetschentoart iwer d’Quetschekraut bis hin zur Quetschendrëpp gët alles ugebueden wat iergendwéi eppes mat Quetschen ze dun huet. Et heescht jo, d’Virfreed as déi schéinsten. Sou as ët och bäim Quetschefest: bis zum Fest selwer as sou munch Préparatioun a Viraarbecht ze leeschten, déi een besonnesch als Kand an als Jugendlechen faszinéiert.

E klenge Schaff-Historik vun der Aarbecht ronderëm d’Quetschefest soll weisen, wéivill fräiwëlleg guddgewëllten Hänn a wéivill Idealismus gebraucht gin fir esou ee Fest ze realiséieren.

D’Preparatiounen vun deem nächste Quetschefest gin un, wann d’Quetschefest eriwer as. An der éischter Comitéssëtzung nom Quetschefest, meeschtens Ufank Oktober, gët de Bilan gemaach. Et gët eng konstruktiv Kritik iwert déi ganz Aktioun d.h. „virum – um – nom Quetschefest“ gemaach. Et gi Verbesserungsvirschléi oder souguer Ännerungen fir dat kommend Quetschefest schrëftlech festgehaal.

An der Comitéssëtzung vum Januar fänken dann déi éischt Preparatiounen un: Kascht,

Museksgruppen, nei Propositiounen, evtl. nei Uschaafungen vu verschiddenem Material, Bestellung vun de Stengendëppen, evtl. Amaachsglieser asw. gin duerch de

Comité an Opdrag gin. An d’Jugend as äifreg derbäi, sech Gedanken iwert d’Quetscheparty ze maachen, déi den 18. September 1992 (d’Joer vun der Grënnung vun der Ennerorganisatioun: Jugend Amicale Elléng) fir d’éischte Kéier iwert d’Bühn gaang as.

Am Fréijoer gin d’Holzreserven opgestockt. Et gët sech informéiert wéi d’Situatioun vun der Quetscherecolte as a gläichzäiteg gi verschidden Terminer mat eisem Quetscheliwerant, dem Här Zimmermann vu Lohr (F) ofgemaach.

Enn Juni oder Ufank Juli as déi grouss Comitéssëtzung, wou dat ganzt Quetschefest virbereed gët. Alles gët hei duerchgecheckt. D’Erfaarungen vun dem Joer virdrun fléissen an d’Préparatiounen mat eran. D’Programmer an d’Präisser gin opgestallt.

Enn August, Ufank September gët ët dann serieux. Ier d’Quetschen zeideg sin, fueren een oder zwee Comitésmemberen déi bestallten Dëpper sichen. Bis 1998 gouf d’Quetschekraut an Tounendëpper vu verschiddene Gréissten a Formen vun der Mme Wilhelms vu Speicher (D) agefëllt.. 1999 gouf am Comité entscheed, eng nei Dëppeserie erauszegin. Déi nei Dëppeserie aus der Poterie Wehrling vu Soufflenheim (F) as limitéiert an der Zuel wéi och an der Zort. Dës Emännerung bréngt mat sech, datt d’Zuel vun de Glieser méi héich gin as. D’Dëpper vu Speicher wéi och vu Soufflenheim sin handgemaach. D’Opschrëft as ëmmer „Elléng“ an déi jeweileg Joereszuel. Si variéieren an der Faarw an hun e gewëssene Sammlerwert.

Eng oder zwou Wochen virum Termin vum grousse Kachdag gin all Leit aus dem Duerf informéiert an invitéiert, fir sech un dësem Kachdag bénévole ze bedeelegen.

Puer Deeg virum grousse Kachdag gët vun enger Rei Jugendlecher a Comitésleit de Schoulhaff mat de Feierplazen préparéiert, grad wéi och d’Material fir ze kachen : Holz, Blecher, Kesselen asw. gi nogekuckt an an de Schoulhaff bruecht fir installéiert ze gin. An engem Spullowend gin dann d’Dëpper an d’Glieser gespullt a prett op d’Dëscher am Schoulsall gesaat

Wann d’Quetschen zeideg sin, da gët eng Camionette organiséiert an zwee vun eise Veräinsleit fueren op Lohr (F) eng gudd Tonn Quetschen sichen.

Samschdes moies vu 6:00 Auer un gët all Aarbechtsmaterial am Schoulhaff vu Jugendlechen fäerdeg opgeriicht, fir dass mer e gudden a schnelle Start hun. Tëschend 6:00 Auer a 7:00 Auer kommen dann och déi éischt Mataarbechter vum Quetschfest, an da kann ët lass gon.

Huerteg gin d’Quetsche gewäsch. An der Tëschenzäit brennt d’Feier, d’Kesselen gi mat Speck ageriwen, e wéineg Waasser gët dragemaach an da gin déi éischt Quetschen an de Kessel geworf an ët richt éen ët schon am ganzen Duerf. Lues a lues fëllen sech déi 7 Kofferkesselen mat Quetschen. D’Kesselen gin nummeréiert an op enger Uschlotafel gin dann déi wichtegst Auerzäiten festgehaal. Dëst as virun allem wichteg, well déi eenzel Leit, déi d’Kesselen réieren sech och alt ofwiesselen. Eise Kachmeeschter, de Pier Bichler, hält all dës Informatiounen am Bléck. D’Ellénger Quetschekraut gët no aaler lëtzebuerger Method am Kofferkessel gekacht aus Quetschen an Zocker, natiirlech, reng a propper.

No gudd 2 Stonnen sti Bidden mat de Reideren prett a waarden drop, datt d’Quetschen aus de Kesselen duerch de Reider gemaach gin. Wann dëst alles geschidd as, dann as esou munch Hektik do: d’Kesselen mussen vu staarke Männer vum Feier geholl gin, déi zwou Equipen mam Reider hun all Hänn voll ze din. Déi Kesselen, déi nach net grad prett sin, mussen weider Holz nogeluecht kréien. Je, et gët an deem Moment u villes ze denken.

Da gin eng Rei Kesselen preparéiert fir eng nei Serie Quetschen op de Reider virzebereeden. De Rescht Kesselen gin dann mam “Quetschejus“ fir de Finissage gefëllt.

D’Auerzäit gët opgeschriwwen an eise Kachmeeschter, de Pier, notéiert op d’Tafel wéini den Zocker an de Kessel kënnt, meeschtens nodeem ët eng Stonn gudd gekacht huet. Wann ët dann ëm d’Schmaache geet, da sti vill Zongen do fir ze lecken an déem engen as et ze séiss, déem aaneren net séiss genuch, fir deen een huet et nach net déi richteg Faarw a fir deen aaneren as ët nach net stäif genuch.

No ca. 2 - 3 Stonnen gët de Kessel vum Feier erofgeholl a vu staarke Männer an de Schoulsall gedroen. Mat vill Gedold gët d’Quetschekraut an d’Dëpper an an d’Glieser agefëllt, déi vu villen Hänn duergehaal gin. Rare sin déi, déi d’Hänn verbrannt kréien. D’Dëpper zou maachen as eng Aarbecht, déi gedëlleg Meedercher a Fraen iwerhuelen.

Op dësem aarbechtsräichen Dag léisst d’Amicale Elléng sech ët net huelen a suergt dervir dass d’Leit och net Honger an Duuscht leide mussen. Eng Rei Leit si jo och schon vu moies 6:00 Auer bis owes 20:00 Auer do a freën sech géint 9:00 Auer op eng gudd Taass Kaffi an eng Mëtsch. Den Dag iwer gët gegrillt. Midd an awer frou kléngt dësen Dag a Gesellegkeet aus. D’Virbereedung as wuel sou schéin wéi d’Quetschefest selwer.

Eng gudd Woch méi spéid gët en Duerfverkaf ugebueden, fir datt d’Duerfleit ouni Stress Gebées kënne kaafen.

Fir daat 15. Quetschefest, vum 16. bis den 18. September 1994, hat d’Amicale Elléng Quetschen T-Shirten an Kaapen maache gelooss. D’Motiv si Quetschen mat der Opschrëft „Ellénger Quetschefest“ an „Amicale Elléng A.s.b.l.“. D’T-Shirten si wäiss (S - XXL) an d’Kaape si blo a wäiss.

Wéivill Quetschekraut all Joers am Schoulhaff gekacht gët, variéiert vu Joer zu Joer.

1996 hate mer 412 verschidden Dëpper vu Speicher an 280 Glieser d.h. mir haten 692 Gefässer fir ongeféier 1.012 kg Quetschen fir schlussendlech 584,20 l Quetschekraut ze hun.

1999 hate mer 120 Dëpper vu Soufflenheim a 645 Glieser d.h. mir haten 765 Gefässer fir ongeféier 1.050 kg Quetschen fir schlussendlech 494,77 l Quetschekraut ze hun.

An der leschter Woch virum Fest gët d’Zelt opgeriicht an ageriicht.

Dënschdes as den Dag, wou d’Zelt opgeriicht gët, mëttwochs, wou Théiken an Dëscher ageraumt a gebotzt gin a wou d’Zelt dekoréiert gët, donnesches gët sou munch Material op e Won gelueden a fir freides prett gemaach. Freides lafen déi lescht Virbereedungen: d’Jugend preparéiert d’Zelt fir hir Party , de geluedene Won gët vum Traki-Service op d’Gare bruecht, den Deeg fir d’Waafelen an d’Taarten gët virbereed. Fir de Kascht um Quetsche-Week-end gët alles ugeriicht. Eis Kichechefen waren: Maria Faber, Catherine Ludovicy, Aline Bredimus an am Moment sin ët d’Josette Siebenaler an d’Agathe Ohl.

Um Fest selwer leeft baal alles vum selwen, well duerch déi ganz Virbereedungszäit si mer gudd openéen agestëmmt an trotz der viller Aarbecht as vill Freed do. Freides as d’Jugend- Amicale Elléng verantwortlech fir d’Quetscheparty (zënter 1992) a si léisst sech och all Joers eppes Neies afaalen. Sou wéi d’Quetschefest selwer kleng ugefaang huet, huet d’Party vun der Jugend och kleng ugefaang. Mée och si kennt haut e grousse Succès. D’Ziel vun dëser Initiativ war fir de Kontakt tëschend der „Amicale“ an der Ellénger Duerfjugend ze förderen an domatter dem Club „Amicale“ eng Zoukunft ze gin andeems d’Memberen vun der Amicale och Zäit an d’Jugendaarbecht investéieren, déi natiirlech indirekt dem Veräin zegutt kënnt.

Nodeem d’Jugend d’Zelt propper verlooss huet, gët Samschdes moies de Rescht ageraumt. Em 12:00 Auer geet ët mat Gegrilltem a mat Fritten lass. Alles wat mat Quetschen ze dun huet, as gefrot. Net nëmmen als Attraktioun, mée och fir de Werdegang ze weisen gët samschdes a sonndes jeweils e Kessel Quetschekraut gekacht. Sou waren dat z.B. an 2 Deeg ca. 200 kg Quetschen, wat 220 Glieser gi sin mat am Ganzen 95,28 l Quetschekraut (2003).

Pinchitos Morunos, Wëld, Hâmeschmier, Quetscheschmier, Ierbessebulli (2003: 112 Portiounen), Geschnetzeltes (2003: 65 Portiounen) stoungen an de vergaangene Joeren um Samschdes Owes-Kascht, net ze vergiessen eis bekannte Sangria.

Freides a Samschdes hu mer Nuetswaachen am Zelt an hir Nuechten sin ëmmer kuurz an sie si frou, den Daag drop erëm an engem richtege waarme Bett ze schlofen.

Sonndes moies bereed de Koschter, Raymond Goedert, d’Zelt fir d’Sonndesmass vir. Fir dann awer d’Nuetswaachen, wackreg ze kréien, as net ëmmer einfach. D’Mass am Zelt gët gestalt vun Ellénger Massendénger a vum Gitarsgrupp aus eiser Porgemeinschaft an zesummen mat eiser Chorale Ste - Cécile Elléng.

No der Mass sin erëm vill Hänn do, fir dass d’Zelt fir de Kiirmesappero erëm prett as. Den Haaptkascht vu Sonndes as déi bekannte Ellénger Choucroute (2003: 204 Portiounen).

Um Quetschefest 1998 sin z. B. 21 Hâmeschmieren, 96 Ierbessebulli, 222 Choucroute a 95 Geschnetzeltes zervéiert gin.

Samschdes wéi Sonndes gët net u Stëmmung gespuert. As Samschdes den traditionellen Kiirmesbal, sou kënnt Sonndes nomëttes d’Fanfare Mondorf-Altwiis eis nach méi an d’Kiirmesstëmmung bréngen. D’Quetschefest kléngt dann mat enger Uucht a gemittlecher Musek aus.

Nom Fest as och ëmmer eng gutt Equipe do, déi ofriicht a praktesch an engem Dag as alles verschwonn. Esouguer Sonndes owes gët schon en Deel ofgeriicht.

Schlussendlech bleiwt nach déi flott Erënnerung an dat, wat éen d’Joer drop aaneschters oder besser ka maachen.

Vill Aarbecht an Zäit stecht an dësem Fest, an dobäi as d’Aarbecht nach net all opgezielt gin. Et kënnt op vill Hänn un. Iwer 80 fräiwëlleg Mataarbechter aus eisem Duerf ënnerstetzen eis, aaneschters gesot: ronn 50 Stéit vun 100 bedeelegen sech aktiv um Fest. D’Amicale as e Familjeveräin: ët as ëmmererëm schéin ze gesin, wéi d’Kanner a Jugendlecher mat abezunn gin a wéi och eeler Leit, déi aus Altersgrënn elo net méi hëllefe kënnen, awer nach ëmmer luusse kommen a frou sin an sech un déi aal Zäiten erënneren. Un eis, déi mir weder jonk nach aal sin, as ët, eis eiser Verantwortung bewosst ze bleiwen an en Ouer ze behaalen fir Jonk an Aal a fir jidfereen aus eisem Duerf. Nëmmen esou kann d’Amicale Elléng och mam Quetschefest e Wée an d’Zoukunft goen.

Eng nei Etapp fir d’Quetschefest wäerd 2004 ufänken, wann dëst Fest (daat 25. Quetschefest) fir d’éischte Kéier an sénger Geschicht zu Elléng am neie Veräinshaus wäerd sin. Mat dëser Etapp wäerd sech net nëmmen sou munnches um Programm änneren, mée och eng Rei Aarbechtserliichterungen wäerden eis eng grouss Hëllef sin. Mée trotzdeem ouni Schaffen an Idealismus wäerd ët och hei net goen.

Zum finanzielle Punkt as ze soen: d’Quetschefest as bis elo d’ “Paie” vun eisem Duerfveräin. Wat geschidd mat dëse Suen?

An déene leschte Joeren gouf probéiert d’Onkäschten vum Quetschefest esou kleng wéi méiglech ze haalen, andéems verschidden Aarbechtsmaterialien ugeschaaf gi sin, déi och fir aaner Zwecker zur Verfügung gestalt gin. (z.B.: Inox Griller, 2 nei Kesselen, Réirer, Bidden, Dëppen, Frittendëppen, Waafeleisen asw.) Trotz dëser Verbesserung sin d’Onkäschten nach héich.

Sou wéi ët an eise Statuten steet gin dës Suen engersäits an d’Verschéinerung vum Duerf investéiert. Verschidde Projet’en sin oder gin realiséiert: esou goufen z.B. nei Inten, e Fresch an e Männchen op de Sprangbuer installéiert, nei Netzer an d’Goaler, e neie Blummenteimer ugeschaaf, eist Faass gouf renovéiert, Blummebakken, Blummenaktioun, Plang vun Elleng, eng B.Kleedung, eng Joeresversecherung, Bänken laanscht d’Wéer asw., Material gouf ënnerhaalen ... an nach Villes méi.

Aanersäits gët awer d’Duerfgemeinschaft och gefördert duerch e grousst Angebot, wat als Ziel huet d’Duerfliewen an d’Duerfgemeinschaft lieweg ze haalen. Sou fléissen z. B. en Deel vun dëse Suen an déi eenzel Aktivitéiten (vun de Kanner iwert d’Jugend bis zou den eelere Awunner), wou net op de Benefice hi geschafft gët, mée wou den Akzent op der frëndschaftlecher Begéignong läid. Zënter 1991 gët intensiv mat der Jugend geschafft als „Jugend Amicale Elleng“. Et gët och zesummegeschafft mam „Mammen-Treff-Team“ (1994) an mam „Theater-ensembel Enner Wouer“ (2002). Dës 3 Ennerorganisatiounen sin an eis Statuten verankert.

D’Fraen a Mammen, d’Ellénger Massendénger, d’Chorale Ste Cécile Elléng an d’Ellénger Pompjeën gin duerch eng Prime d’Encouragement, déi näischt mam Matschaffen um Quetschefest ze doen huet, vun der Amicale Elléng finanziell ënnerstëtzt. Domatter sollen d’Duerfveräiner encouragéiert gin an och erméiglecht kréien weiderhin d’Duerfliewen ze förderen.

D’Quetschefest as eng Erausfuerderung a verlaangt vu jidferengem dée matschafft am Duerf vill Engagement net nëmmen déi 3 Deeg vum Fest, mée och an déenen Deeg virum an nom Quetschefest.

Ech hiewen nach eng Kéier ervir, datt ët flott as fir ze gesin, datt Kanner, Jugendlecher, Erwuessener an eeler Leit sech disponibel stellen, wann ët heescht: d’Quetschefest réckt ëmmer méi no. Fir d’Veräiner allgemeng wäerd ët an der Zoukunft net méi einfach gin. Villes as aus eisen Dierfer verschwonnen. Vill Leit wëllen no hirer Schaff kee méi gesin.

An trotzdeem, jidferéen aus eiser Mëtt as wëllkomm. Et as keen zevill. A mir freën eis op all begeeschtert nei Mathëllef. Avis aux amateurs!

Raymond Goedert